شاعری
دستک۔۔۔۔۔!!!
از
حناء شاہد
شاعری
دستک۔۔۔۔۔!!!
از
حناء شاہد
خواب مرتے نہیں
خواب دل ہیں نہ آنکھیں نہ سانسیں کہ جو
ریزہ ریزہ ہوئے تو بکھر جائیں گے
جسم کی موت سے یہ بھی مر جائیں گے
خواب مرتے نہیں
خواب تو روشنی ہیں ، نوا ہیں ، ہوا ہیں
جو کالے پہاڑوں سے رکتے نہیں
ظلم کے دوزخوں سے پھکتے نہیں
روشنی اور نوا اور ہوا کے علم
مقتلوں میں پہنچ کر بھی جھکتے نہیں
خواب تو حرف ہیں
خواب تو نور ہیں
خواب سقراط ہیں
خواب منصور ہیں
(احمد فراز)
٭٭٭٭٭٭٭٭٭٭٭٭٭٭٭
کوئی تصویر مکمل نہیں ہونے پائی
(1)
اب جو دیکھیں تو کوئی بڑی بات نہ تھی
یہ شب و روز مہ و سال کا پُر پیچ سفر
قدرے آسان بھی ہو سکتا تھا !
یہ جو ہر موڑ پہ کچھ الجھے ہوئے رستے ہیں
ان میں ترتیب کا امکان بھی ہو سکتا تھا!
ہم ذرا دھیان سے چلتے تو وہ گھر
جس کے بام و در پہ ویرانی ہے!
جس کے ہر طاق میں رکھی ہوئی حیرانی ہے!
جس کی ہر صبح میں شاموں کی پریشانی ہے!
اس میں ہم چین سے آباد بھی ہو سکتے تھے!
بخت سے امن کی راہیں بھی نکل سکتی تھیں!
وقت سے صلح کا پیمان بھی ہو سکتا تھا
٭٭٭٭٭٭٭٭٭٭٭٭
(2)
اب جو دیکھیں تو بہت صاف نظر آتے ہیں
سارے منظر بھی پس منظر بھی
لیکن
اس دیر خیالی کا صلہ کیا ہو گا؟
یہ تو سب بعد کی باتیں ہیں
میری جان!
انہیں دیکھتے، سوچتے رہنے سے بھلا کیا ہو گا؟
وہ جو ہونا تھا ہوا۔۔۔۔۔ہو بھی چکا
وقت کی روح پہ لکھی ہوئی
تحریر کے حرف
خطِ تنسیخ سے واقف ہی نہیں
بخت مکتب کے رجسٹر کی طرح ہوتا ہے
اپنے غیر پہ جو لبیک نہیں کہہ پاتے
ان کا کچھ عذر نہیں۔۔۔۔۔۔۔کوئی بھی فریاد نہیں
یہ وہ طائر ہیں
جنہیں اپنی نوا یاد نہیں
٭٭٭٭٭٭٭٭٭٭
(3)
لائنیں کتٹی رہیں
لفظ بدلنے کے سبب
کوئی تحریر ، مسلسل نہیں ہونے پائی
حاصلِ عمر۔۔۔۔۔۔۔۔۔یہی چند ادھورے خاکے!
کوئی تصویر مکمل نہیں ہونے پائی
(امجد اسلام امجد)
٭٭٭٭٭٭٭٭
(جاری ہے)
٭٭٭٭٭٭
