جو چاہا میں نے وہ پا لیا

از

حناء شاہد

چودھویں رات کا چاند عروج پر تھا۔چاند کی ٹھنڈک بھری چاندنی چہارسو پھیل رہی تھی۔ ایک چھوٹے سے گھر کے کچی مٹی سے بنے ہوئے دالان میں ایک نوعمر لڑکی دروازے کی چوکھٹ میں بیٹھی تھی۔ اس حالت میں کہ آنکھوں میں لالی اتری ہوئی تھی اور پلکیں نم تھیں۔ تھوڑی تھوڑی دیر بعد اس کی آنکھوں سے آنسو نکلتے ، وہ اپنے سفید گلابی رخساروں سے نرم و ملائم ہاتھوں کے ساتھ ان آنسوؤں کو صاف کرتی۔ کبھی وہ اپنے آپ کو دلاسے دیتی اور کبھی رونے لگ جاتی۔ کبھی وہ چاند کی طرف دیکھتی اور کبھی گھر کی دیواروں کی طرف۔۔۔۔۔۔۔۔!!!                                                                                         

  چاند کی مدھم سی روشنی میں کچی مٹی اور گارے سے بنی ہوئی دیواریں عجیب خوفناک منظر پیش کر رہی تھیں۔ جنہیں دیکھ کر اس کے اندرتنہائی کا عجیب سا خوف پنپ رہا تھا۔ پھر وہ گہری سوچ میں گم ہو گئی۔ کچھ توقف کے بعد اچانک دروازے پر ہونے والی دستک نے اسے چونکا دیا۔ بغیر ادھر اُدھر دیکھے وہ دروازہ کھولنے کے لیے تیزی سے اُٹھی۔ دروازہ کھولا تو سامنے اس کے ماموں اور ممانی کھڑے تھے۔ انہیں اپنے سامنے دیکھ کر اس کے چہرے پر مسکراہٹ آ گئی۔ وہ اپنی ممانی کے ساتھ لپٹ کر اس طرح روئی جیسے سمندر میں اچانک طوفان آ جائے تو وہ کناروں کے ساتھ زوردار انداز میں آ کر ملتا اور شوروغل برپا کرنے کے بعد خاموش ہو جاتا ہے۔ اس کے لبوں سے صرف ایک ہی صدا بلند ہو رہی تھی۔ وہ اپنی ماں کو یاد کر کے آنسو بہانے لگی۔اس کے ماموں اور ممانی نے اسے تسلی دینی چاہی۔ مگر وہ عمر کے جس حصے میں تھی وہاں تسلیاں، سسکیوں کے بندھ نہیں باندھ سکتیں۔                                               

                                                              “امی! مجھے ہمیشہ کے لیے چھوڑ کر چاند کے اس پار چلی گئی ہیں۔”     

                                                           انگلی سے چاند کی طرف اشارہ کرتے ہوئے ذوباریہ نے سسکی لیتے ہوئے کہا۔ جس پر اس کی ممانی نے اسے گلے سے لگالیا۔                                                                                             

 “ذوباریہ ۔۔۔۔۔۔! صبر کرو بیٹی ۔۔۔۔۔۔! سب کو ایک نہ ایک دن اس دنیا سے جانا ہے۔ اس طرح تم اگر روتی رہو گی تو تمہاری امی کو بھی تکلیف ہو گی۔”                                                                                                                                   

آنسوؤں کا ایک گولہ پھانس کی طرح ممانی کے گلے میں اٹک گیا۔ انہوں نے ایک لمبی سانس کھینچی اور ذوباریہ کو حوصلہ دینا چاہا۔ مگر ذوباریہ کی اگلی بات نے ان دونوں کو یکدم ہی چونکا دیا۔                                                                               

“امی مجھے اکیلا چھوڑ کر چلی گئی ہیں کس کے سہارے۔۔۔۔۔۔؟؟؟”                

                                                                     ذوباریہ نے اپنے آنسو پونچھتے ہوئے سوالیہ انداز میں پوچھا۔                                                                                                                                             

   ” میں ہوں تمہاری ماں۔۔۔۔۔۔! آج سے تم مجھے امی کہہ لینا اور اپنے ماموں کو ابا، بس اب رونا بند کرو۔”                                                                                                                                               

                ممانی نے ذوباریہ کے شانے پر محبت سے ہاتھ دھرا اور ماموں وہ اپنی بیگم کی بات سن کر بےانتہاء خوش ہو گئے۔ بیوی کی خوش مزاجی اور اچھائی ان کا سر ہمیشہ فخر سے بلند کرتی رہی ہے۔                                                                    

                                                                         “اچھا ذوباریہ۔۔۔۔۔! یہ تو بتاؤ تم نے کچھ کھایا ہے۔۔۔۔۔۔۔؟؟؟”                                                                                                                          

    ممانی نے اس کے رخسار پونچھتے ہوئے انتہائی محبت سے پوچھا۔                                                                        

“نہیں مجھے بھوک نہیں ہے۔ اور نہ ہی میرا دل چاہ رہا ہے کچھ بھی کھانے کو۔”                                                  

                                          ذوباریہ نے انتہائی روکھے پن سے جواب دیا تو ماموں نے اس کے سر پر شفقت بھرا ہاتھ رکھا اور جھٹ سے بولے۔                                                                           

 “اگر ذوباریہ کچھ کھائے گی نہیں تو ہماری پیاری سی گڑیا بڑی کیسے ہو گی۔۔۔۔۔۔؟ ابھی تو ذوباریہ نے سکول جانا ہے، تعلیم حاصل کرنی ہے اور بڑی افسر بننا ہے۔”                                                                                        

                         ماموں نے اس کا دھیان ہٹانے کے لیے ادنیٰ سی کوشش کی۔ جو کسی حد تک کامیاب ثابت ہوئی۔                                                                 

“یہ بڑی افسر کیا ہوتا ہے۔۔۔۔۔۔؟؟؟”                                               

                                                                  معصومانہ انداز میں پوچھے گئے سوال نے ماموں اور ممانی دونوں کے چہرے پر مسکراہٹ بکھیر دی۔ دونوں نے جلدی سے ذوباریہ کو اپنے گلے سے لگا لیا اور بےانتہاء پیار کرنے لگے۔

                         ————————————————————–

ذوباریہ کے ماموں کی کوئی اولاد نہیں تھی۔ وہ خیرپور گاؤں میں اپنی بیوی کے ساتھ اچھی زندگی گزار رہے تھے۔ وہ ایک صابر و شاکر خاتون تھیں۔خدا نے انہیں اولاد جیسی نعمت سے محروم رکھا تھا۔ مگر ان دونوں کی زبان پر کوئی شکوہ نہیں آیا تھا۔ پھر اچانک بہن کی موت کی خبر نے انہیں غم سے نڈھال کر دیا تو بیوی نے انہیں خوشی کی نوید سنا دی ذوباریہ کے سر پر شفقت بھرا ہاتھ رکھ کر اسے بیٹی بنا لیا۔ بیوی کی اس محبت و شفقت نے بہن کے غم کو بھلانے میں کافی مدد کی۔

پھر ذوباریہ جو ان کی اکلوتی بہن کی آخری نشانی تھی۔ ہر وقت اسے اپنے سامنے ہنستا کھیلتا خوش دیکھ کر ان کے دل کو اطمینان اور سکون سا ملتا۔ وہ اسے خوش دیکھ کر بے حد خوش تھے۔                                                        گھر کے افراد میں اضافہ ہوا تو روزگار کے لیے ذوباریہ کے ماموں نے ادھر اُدھرہاتھ پاؤں مارنے شروع کیے۔ پھر ایک دوست کے مشورے پر انہوں نے گاؤں کے چوہدری کرامت حسین سے کچھ پیسے ادھار لے لیے اور گھر میں چھوٹی سی دکان بنا لی اور دکان میں روزمرہ ضروریات کی چیزیں رکھ لیں۔ ابتداء میں نقصان ہوا لیکن پھر آہستہ آہستہ وقت گزرنے کے ساتھ ساتھ فائدہ ہونے لگا۔

بالآخر ایک ڈیڑھ سال کے عرصے میں ذوباریہ کے ماموں نے چوہدری کرامت حسین سے جو رقم ادھار لی تھی وہ واپس کر دی۔                                                                                                                          زندگی کے شب و روز یونہی گزرتے رہے۔ ذوباریہ کے ماموں اور ممانی نے اس کی تعلیم و تربیت پر بےحد توجہ تھی۔ گاؤں کا چوہدری کرامت حسین بظاہر تو ایک اچھا انسان تھا۔ لیکن اس میں ایک بہت بڑی خامی تھی۔ وہ لڑکیوں کی تعلیم کے سخت خلاف تھا۔ اگر کوئی بھی اس کے پاس جا کر کسی بھی قسم کی مدد کی درخواست کرتا تو وہ فوراً اس کی مدد کر دیتا۔ اپنے گاؤں کے لڑکوں کو تعلیم دلوانے کی طرف اس کا رجحان تھا۔ لیکن عورتوں کو تعلیم حاصل کروانے کے وہ سخت خلاف تھا۔ کیونکہ اس کی اپنی خودساختہ سوچ تھی کہ عورت تعلیم حاصل کرنے کے بعد کچھ نہیں کر سکتی۔                                                                                                                                           

اگر گاؤں کی لڑکیاں سکول جا کر تعلیم حاصل کریں گی تو کھیتوں میں کام کون کرے گا۔۔۔۔۔۔۔؟ گھر کے کام کاج اور دوسرے امورِ خانہ داری کون سنبھالے گا۔۔۔۔۔۔۔؟”                                                                                                          

 یہ اس کی اپنی خودساختہ اور دقیانوسی سوچ تھی۔ جسے بدلنے کی ضرورت تھی۔ مگر کون یہ جرات کون کر سکتا تھا۔۔۔۔۔۔؟

گاؤں کے بہت سارے افراد نے اسے بارہا سمجھانے کی کوشش کی ۔لیکن چوہدری کی سمجھ میں کچھ نہ آیا۔ اور وہ اپنی ضد پر قائم رہا۔                                                                                                                                     چوہدری نے گاؤں میں لڑکیوں کے واحد ہائی سکول کا نام بھی بدل دیا اور وہاں صرف لڑکوں کو تعلیم حاصل کرنے کی اجازت دی۔ جبکہ چوہدری کرامت کا اپنا اکلوتا بیٹا شہر کے ایک بہت اچھے بورڈنگ سکول میں پڑھتا تھا۔

ذوباریہ کے ماموں ساتھ والے گاؤں کے سکول میں روزانہ اسے صبح چھوڑنے اور پھر دوپہر کو لینے جاتے۔ اس نے دسویں کا امتحان بڑے اچھے نمبروں کے ساتھ پاس کیا اور مزید پڑھنے کی ضد کی لیکن اردگرد کے گاؤں میں کوئی ایسا ادارہ نہیں تھا جو دسویں جماعت سے آگے تعلیم کی سہولتیں فراہم کر سکے۔ بالآخر ذوباریہ کی ضد رنگ لے آئی اور اس کے ماموں نے گاؤں والوں کو بتائے بغیر اس کا داخلہ شہر کے ایک سرکاری کالج میں کروا دیا۔ ہر مہینے کے آخر میں وہ اس سے ملنے جاتے اور کچھ پیسے اسے دے دیتے۔ جس سے وہ اپنے کالج کے اخراجات پورے کر لیتی۔                                                                                           وقت گزرتا گیا اور ذوباریہ نے گریجوایشن کر لیا۔ ذوباریہ کی روم میٹ نے ایک دن اس سے ایک سوال پوچھا۔ جس کے جواب نے سب کو چونکا کر رکھ دیا۔                                     

                                                “تمہارا تعلق تو دیہات سے ہے۔ اور وہاں پر کوئی ایسا ادارہ بھی نہیں ہے جہاں تم ملازمت کر سکو۔ پھر اتنی محنت کرنے اور اعلیٰ تعلیم حاصل کرنے کا تمہیں کیا فائدہ۔۔۔۔۔۔۔؟؟؟”                                     

                                                              ذوباریہ نے ایک نظر اس کی طرف دیکھا اور پھر انتہائی جراۤت سے بولی۔                                                                                 

“اس دنیا میں وہ انسان کامیاب ہے جو خطرات و مشکلات میں سے گزر کر کامیابی حاصل کرتا ہے۔ میں اس بات کا اقرار کرتی ہوں کہ میرے گاؤں میں تعلیم حاصل کرنے کے لیے مواقع نہیں ہیں۔ لیکن میں اپنی تعلیم اور اس شعور کے ذریعےٰ جو تعلیم سے مجھے حاصل ہوا ہے۔ ہر ممکن کوشش کروں گی کہ میرے دیہات میں رہنے والا ہر لڑکا اور ہر لڑکی زیورِ تعلیم سے آراستہ ہوں۔ پھر میں تسلیم کروں گی کہ میری ڈگریوں اور رات دن کی محنت کا صلہ مجھے ملے گا۔”                                                                                                            

وہ پُرعزم انداز میں بول رہی تھی۔ اس کے ارادے بہت بلند تھے اور اسے خدا پر یقین بھی تھا وہ جو سوچ رہی ہے خدا اس میں اس کی مدد فرمائے گا۔                                                                                                         

                 —————————————————————————

تعلیم مکمل کرنے کے بعدجب ذوباریہ نے اپنے گاؤں واپس آنے کا فیصلہ کیا تو اس کے ماموں اور ممانی کی خوشی دیدنی تھی۔ آخرکار وہ وقت آ ہی گیا جب ذوباریہ نے اپنے گاؤں، اپنے کھیتوں اور اپنے کھلیانوں میں دوبارہ قدم رکھا۔ ممانی تو خوشی سے پھولی جا رہی تھیں۔ جلدی سے ذوباریہ کو گلے سے لگایا اور بےحد پیار کیا۔                                                                                                                                                          دن گزرتے گئے، آہستہ آہستہ سارے گاؤں والوں کو علم ہو گیا کہ محمود کی بیٹی اپنے چچا کے گھر نہیں بلکہ شہر سے چوداں جماعتیں پڑھ کر آئی ہے۔ جب چوہدری کرامت کو اس بات کا علم ہوا تو فوراً اس نے پنچایت بلا لی۔ تاکہ ذوباریہ کے ماموں اور ممانی کو گاؤں کا قانون توڑنے کی سزا دی جائے۔ چوہدری کرامت کے خیال میں

محمود الہیٰ کا قصور زیادہ ہے۔ جس نے لڑکی ذات کو اتنی اہمیت دی کہ اسے تعلیم حاصل کرنے کے لیے شہر بھیج دیا۔ گاؤں والوں سے ذوباریہ کے ماموں بےحد خوفزدہ تھے۔ مگر ذوباریہ نے انہیں حوصلہ دیا اور انتہائی جراۤت سے بولی۔                         

                                                      “آج میرا امتحان ہے۔۔۔۔۔۔۔! شہر میں، میں نے جتنے بھی امتحان دیے وہ محض کاغذ کے چند ٹکڑے حاصل کرنے کے لیے تھے۔ لیکن آج وہ دن آ گیا ہے جس کا مجھے ہمیشہ سے انتظار تھا۔ اپنے گاؤں، اپنے دیہات میں ان کاغذ کے ٹکڑوں کا صحیح استعمال کرنے کا وقت آ گیا ہے۔”                                                                                              

ذوباریہ کے ماموں کو اس کی باتوں کی سمجھ نہیں آ رہی تھی۔ مگر انہیں یقین تھا کہ جو وہ کہہ رہی ہے۔ اللہ اسے اس میں کامیابی ضرور عطا کرے گا۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ذوباریہ اور اس کے ماموں مقررہ وقت پر چوہدری کرامت کے ڈیرے پر پہنچ گئے۔ جہاں گاؤں کے سرپنچ اور دیگر افراد بھی موجود تھے۔                                                                                      

“اسلام علیکم۔۔۔۔۔۔۔!!!”                                                                                                                                   

ذوباریہ نے بےحد مہذبانہ انداز میں سب کو سلام کیا۔ چوہدری کرامت اور گاؤں کے تمام افراد ذوباریہ کو دیکھ کر حیران رہ گئے۔ وہ کسی طور سے بھی شہر میں رہنے والی لڑکیوں کے ساتھ مشابہہ نہ تھی۔ خیرپور کے لوگوں کے ہاں یہ تاثر عام تھا کہ شہر میں رہنے والے لوگ اپنی تہذیب و ثقافت کو چھوڑ کر اغیار کے اوصاف کو اپنا لیتے ہیں۔ مگر ذوباریہ نے اپنی تہذیب و ثقافت کو اپنائے رکھا اور مثال پیش کی کہ تعلیم انسان کو باغی نہیں بلکہ ایک مہذب انسان بناتی ہے۔                 

  “کیا نام ہے بیٹی تمہارا۔۔۔۔۔۔۔؟؟؟”                                                                                                        

چوہدری کرامت نے انگلی سے اشارہ کرتے ہوئے پوچھا۔                                                             

“جی ذوباریہ۔۔۔۔۔۔!!!”                              

                                                                                               محمود الہیٰ جھٹ سے بول پڑا۔  جس پر چوہدری کرامت نے خفگی سے اس کی طرف دیکھا۔                                        

   “ہاں! تو ذوباریہ۔۔۔۔۔۔! یہی نام ہے تمہارا۔۔۔۔۔۔؟”                                 

                                                                                                                                چوہدری کرامت نے سنجیدگی سے پوچھا۔ پنچایت میں اس وقت بالکل خاموشی تھی۔                                                                                “جی۔۔۔۔۔۔۔!!!”                                                                                                                            ذوباریہ نے دھیمے انداز سے سر کو ہلا کر جواب دیا۔        

   “تمہیں معلوم ہے کہ تم اس گاؤں کی بیٹی ہو اور بیٹیوں کا کام تو کھیتوں میں کام کرنا، گھرداری سیکھنا، شادی کرنا، بچے پالنا اور دیگر امورِ خانہ داری سنبھالنا ہے۔”                                                                                                                     

چوہدری کرامت کے لہجے میں حلاوت تھی مگر الفاظ سخت تھے۔ ذوباریہ چوہدری کرامت کی بات مکمل ہونے کی منتظر تھی۔ چوہدری کرامت نے پھر بولنا شروع کیا۔                                                                        

   “تمہیں معلوم ہے کہ تمہاری ماں کے انتقال کے بعد سارے گاؤں والوں نے تمہیں بیٹی سمجھا، تمہارا خیال رکھا۔ پھر بھی تم نے ہمارے گاؤں کے قانون کے خلاف جا کر تعلیم حاصل کی اور وہ بھی شہر کی آزاد فضاؤں میں۔۔۔۔۔۔۔۔۔! بمیں اور سب گاؤں والے تم سے اور محمود الہیٰ سے سخت ناراض ہیں اور نہ چاہتے ہوئے بھی تم دونوں کو سزا دیں گے۔ کیونکہ تم نے ہماری شفقت، ہماری محبت کا اور اعتماد کا ناجائز فائدہ اُٹھایا ہے۔”

                                                                                                                                                                       چوہدری کے انداز سے برہمی واضح تھی۔ اس برہمی کو بھانپتے ہوئے ذوباریہ نے دھیمے انداز سے گفتگو کا آغاز کیا۔                                                                                                                       

  “مجھے آپ کا ہر فیصلہ منظور ہے۔ جو بھی سزا آپ مجھے دیں گے وہ مجھے قبول ہو گی۔ لیکن میری آپ سے ایک درخواست ہے۔ مجھے اپنی صفائی میں کچھ کہنے کا موقع دیا جائے۔”                                                                       

ذوباریہ نے درخواست کی۔ چوہدری کرامت نے پنچائیت کے دیگر افراد کی طرف دیکھا اور پھر کچھ لمحے بعد گویا ہوا۔                         

                                                                                                                             “ٹھیک ہے۔۔۔۔۔! ہماری طرف سے تمہیں اجازت ہے۔ بولو تم کیا کہنا چاہتی ہو۔۔۔۔۔۔۔؟؟؟”                                                  

                                                                                                                                     چوہدری نے ہاتھ ہلا کر اس کی طرف اشارہ کیا اور اسے بولنے کی اجازت دی۔                                                                     

                                                      “چوہدری صاحب۔۔۔۔۔۔! آپ نے قرآن مجید اور حدیثِ رسول صلی اللہ علیہ والہ وسلم کا مطالعہ کیا ہے۔۔۔۔۔۔؟؟؟”                                                                                      

                                                                 ذوباریہ نے سنجیدگی سے پوچھا تو چوہدری کرامت ہنسنے لگا۔                                                                          

  “یہ بھی کوئی پوچھنے والی بات ہے۔۔۔۔۔۔۔۔؟ اللہ کی کتاب اور حدیثِ رسول صلی اللہ علیہ والہ وسلم تو سب ہی پڑھتے ہیں۔”                                                                                                                                        

چوہدری کرامت کی بات سن کر ذوباریہ دھیمے سے مسکرا دی۔ مگر دوسرے ہی لمحے سنجیدگی سے اس نے ایک بات کہی۔ جس کو سن کر چوہدری کرامت خفا ہو گیا۔                                                                                                                       

“مگر ! عمل کوئی کوئی کرتا ہے۔”                      

                                                                                                                                       “کیا مطلب ہے اس بات کا۔۔۔۔۔۔۔؟؟؟”                                                                                                                                                                                                                                                 

                                                    چوہدری کرامت کے انداز میں خفگی تھی۔                                           

                                                           “مجھے تو یہی لگتا ہے کہ آپ نے اللہ تعالیٰ کے ان ارشادات کو جو قرآن مجید کی آیاتِ مبارکہ میں مذکور ہیں کو بھلا دیا ہے۔ نبی صلی علیہ والہ وسلم کی ذات جو ہم سب کے لیے باعثِ شفاعت ہے۔ جن کے دیگر ارشادات اور سنت پر تو آپ خوب عمل پیرا ہو کر خدمتِ خلق اور ایصالِ ثواب کے حقدار بن رہے ہیں۔ لیکن آپ نے اسی پیغمبر کے اس ارشادِ گرامی کو تو یکسر ہی بھلا دیا ہے۔”                                                                                

آپ صلی اللہ علیہ والہ وسلم کا فرمان ہے:                                                                                                                                                                                                      

               “علم حاصل کرنا ہر مسلمان مرد اور عورت پر فرض ہے۔”                                                                                                                         

چوہدری کرامت سمیت گاؤں کے دیگر افراد ذوباریہ کی بات سن کر دنگ رہ گئے۔ مگر خاموشی کے قفل ان کی زبانوں پر لگے تھے۔ ذوباریہ نے ایک نظر سب کی طرف دیکھا اور پھر بولنے لگی۔                                                      

ایک اور موقع پر آپ صلی اللہ علیہ والہ وسلم نے ارشاد فرمایا ہے:                                          

                                                                                      “علم حاصل کرو چاہے تمہیں اس کے لیے چین بھی جانا پڑے۔”                                    

    “چوہدری صاحب! میں تو صرف حصولِ علم کے لیے شہر گئی ہوں۔”                                                 

  استفہامیہ انداز میں کہی گئی بات نے چوہدری کرامت کو حیرت زدہ کر دیا۔                   

                                                                                                                                                                       “چوہدری صاحب! ابھی کچھ دیر پہلے آپ نے ہی خود کہا ہے کہ اس گاؤں کا ہر لڑکا آپ کا اپنا بیٹا اور ہر لڑکی آپ کی بیٹی ہے۔”                                                                                                                      

   ذوباریہ نے انہیں یاد دہانی کروائی۔                                                             

                                                                                 “ہاں! تو ٹھیک ہی کہا ہے میں نے۔۔۔۔۔۔! میں اس گاؤں کے سب بچوں کو اپنے حقیقی بچوں کی طرح سمجھتا ہوں۔”                                                                           

                                                                   چوہدری کرامت مونچھوں کو تاؤ دیتے ہوئے جھٹ سے بولا۔                                          

   “اچھا! اگر آپ اس گاؤں کے سب جوانوں کو اپنے حقیقی بیٹے کرامت حسین کی طرح سمجھتے ہیں تو اس بات کا جواب دے دیں کہ گاؤں کے جوان تو گارے اور کچی مٹی کے بنے ہوئے سکول میں تعلیم حاصل کر رہے ہیں آپ کے بیٹے کی طرح وہ شہر میں جا کر تعلیم حاصل کیوں نہیں کر رہے۔۔۔۔۔۔۔۔؟”                 

                                                                                                                                                                                                                                                                                                               اس کا انداز استفہامیہ تھا جو پنچائیت میں بیٹھے سب لوگوں کو حیران کر گیا۔                                                                 

      “آپ کا اپنا بیٹا علی کرامت حسین تو شہر کے ایک بڑے مہنگے کالج میں تعلیم حاصل کر رہا ہے۔ لیکن گاؤں کے جوان اس سکول میں دس جماعتیں پاس کر کے آپ کے کھیتوں اور کھلیانوں میں کام کرنے لگ جاتے ہیں۔”                                                                                     

        ذوباریہ کی اس بات نے چوہدری کرامت کے چہرے کی ہوائیاں اڑا دیں۔ پنچائیت کے تمام افراد اور گاؤں کے دیگر لوگ چہ مگوئیاں کرنے لگے۔

 “چوہدری صاحب! انہی جوانوں کی دن رات کی محنت سے آپ لاکھوں کڑوڑوں کماتے ہیں۔ مگر ان غریب لوگوں کو تو دو وقت کی روٹی بھی صحیح طرح سے میسر نہیں آتی۔ اگر آپ علم و دولت سے مالا مال ہوتے تو ضرور اس فرق کو سمجھتے۔”                                                               

                                                                         حضرت علی رضی اللہ تعالیٰ عنہ نے ارشاد فرمایا ہے:                                                             

  “علم دولت سے بہتر ہے۔ کیونکہ دولت خرچ کرنے سے ختم ہو جاتی ہے لیکن علم جتنا بھی خرچ کیا جائے وہ بڑھتا جاتا ہے۔”                                                                                                                           

                                           “میں نے جو کہنا تھا کہہ دیا، آپ لوگوں کی مرضی ہے جو بھی سزا سنائیں گے وہ مجھے قبول ہو گی۔”                                                                                                                        

                     چوہدری کرامت کا سر ندامت سے جھکا ہوا تھا۔ جبکہ محمود الہیٰ کو ذوباریہ پر بےحد پیار آ رہا تھا۔ اس کی محنت اور عمر بھر کی کمائی رائیگاں نہیں گئی تھی۔ خوشی سے محمود الہیٰ کی آنکھیں چھلک پڑیں۔ اب گاؤں والے اسے جو بھی سزا دیں گے، اس پر اسے کوئی ملال نہیں ہو گا۔ وہ ابھی یہی سوچ رہا تھا کہ ذوباریہ نے دوبارہ سے چوہدری کرامت کو مخاطب کیا۔                                                                                                                                                        

“چوہدری صاحب! کیا آپ کو مجھ میں وہ تہذیب و ثقافت نظر نہیں آئی جو گاؤں کی دوسری لڑکیوں میں موجود ہے۔۔۔۔۔۔؟”                                                                                                                

  اس کا انداز استفہامیہ تھا۔ پھر کچھ دیر خاموش رہنے کے بعد وہ دوبارہ سے بولی۔                                                                                                                           

   “تعلیم نے مجھے شعور دیا ہے۔ اچھے برے کی تمیز سکھائی ہے۔۔۔۔۔۔۔ بس۔۔۔۔۔۔! میں نے فیصلہ کر لیا ہے میں آج ہی سب گاؤں والوں کے گھروں میں جا کر سب سے درخواست کروں گی کہ وہ اپنی بیٹیوں کو میرے گھر تعلیم حاصل کرنے کے لیے بھیجیں۔ اپنی مدد آپ کے تحت میں اس گاؤں میں سکول کالج اور یونیورسٹی بھی بناؤں گی۔ اگر آپ میں سے کوئی میری مدد کرنا چاہتا ہے تو میں اس کی مشکور رہوں گی۔”                                                                                                                              

  ذوباریہ نے پُراعتماد لہجے میں سب سے سوالیہ انداز میں پوچھا تو سارے گاؤں والے ایک دوسرے کی طرف دیکھنے لگے۔                                                                                                                        

  “اگر آپ سب یونہی خاموش رہے تو میں صرف اتنا ہی کہوں گی کہ میرے جانے کے بعد میری باتوں پر غور ضرور کیجیئے گا۔ کیونکہ یومِ حشر حاکم اپنی رعایا کے لیے جوابدہ ہو گا۔ اور آپ تو اس گاؤں کے جوانوں کو دولت بنانے کے لیے استعمال کر رہے ہیں ۔ انہیں شعور دینے کی کوشش تو کریں پھر دیکھیں ہمارا یہ خیرپور گاؤں بہت ترقی کرے گا۔”                                                                         

اب تو ذوباریہ کو اپنا وجود مایوسی اور افسردگی کی کھائی میں گرتا محسوس ہونے لگا تھا۔ مگر امید کی ایک کرن اب بھی کسی گوشے میں جگمگا رہی تھی۔ اس نے ایک لمحے کے لیے نظر اٹھا کر پنچائیت میں موجود سب لوگوں کی طرف دیکھا۔ سب لوگ آپس میں چہ مگوئیاں کر رہے تھے۔ جبکہ چوہدری کرامت حسین خاموش بُت بنا کسی گہری سوچ میں گم تھا۔ ذوباریہ کے قدم لڑکھڑانے لگے۔ ایک لمحے کے لیے اسے یوں لگا جیسے ساری محنت بیکار ہو گئی۔ وہ خواہش ، وہ مقصد کہیں دم توڑ گیا ہے۔

لیکن اگلے ہی لمحے چوہدری کرامت حسین نے اپنی خاموشی کے اس قفل کو توڑ کر جب ذوباریہ کو مخاطب کیا تو پنچائیت میں موجود تمام لوگ چوہدری کرامت کی طرف متوجہ ہو گئے۔                                                                                                                                       

“ذوباریہ بیٹی! آج تم نے میری آنکھیں کھول دی ہیں۔ میں عورتوں کی تعلیم کو ضروری نہیں سمجھتا تھا۔ لیکن میں تو لڑکوں کو بھی دسویں جماعت تک تعلیم حاصل کروانے کے حق میں صرف اس لیے تھا کہ حکومت نے میٹرک تک تعلیم حاصل کرنے کو ضروری کر دیا تھا۔ میں نے میٹرک تک تعلیم اس لیے رکھی تاکہ میں گاؤں میں اپنی حکمرانی قائم رکھ سکوں۔ لیکن میں غلط تھا۔ میری سوچ غلط تھی۔ مجھے معاف کر دو بیٹی۔۔۔۔۔۔!”                                                                       

  چوہدری کرامت اپنی غلطی پر نادم تھا۔ اور ہاتھ جوڑ کر سب گاؤں والوں سے معافی کا طلبگار ہو رہا تھا۔                                                                                                                                                                                        “چوہدری صاحب! آپ شاید زیورِ تعلیم سے آراستہ نہیں ہیں اس لیے آپ سے یہ غلطی سرزد ہوئی ہے۔ مگر مولا کریم کا شکر ادا کریں۔ جس نے آپ کو اپنی غلطی کا احساس دلوایا اور اپنی غلطی سدھارنے کا موقع دیا ہے۔”                                                                         

    محمود الہیٰ ذوباریہ کی جرات پر بےحد خوش ہو رہا تھا۔ پھر چوہدری کرامت کی بات سن کر سارے گاؤں والے خوش ہو گئے۔                                                                                                              

                                                                       “کل سے ہسپتال کی پرانی عمارت میں مرمت کا کام کروایا جائے گا۔ سکول کی بوسیدہ حال عمارت کو نئے طرز کے مطابق تعمیر کیا جائے گا۔ اب گاؤں کے سارے لڑکے اور لڑکیاں صرف تعلیم حاصل کریں گے اور ان سب کاموں میں ہونے والے اخراجات میں خود برداشت کروں گا۔”                                                                             

چوہدری کرامت کی یہ بات سن کر ذوباریہ بےانتہاء خوش ہو گئی۔ اسے یوں لگا جیسے اسے اپنے خواب کی تعبیر مل گئی ہو۔                                                                                                                                خیرپور گاؤں میں خوشحالی کا سفر شروع ہو گیا۔ ذوباریہ نے گاؤں کے پرائمری سکول میں پڑھانا شروع کر دیا۔ وہ اپنی زندگی سے بےحد خوش اور مطمئن تھی۔ کیونکہ اس کے خیال میں زندگی اپنے لیے نہیں بلکہ دوسروں کے لیے جینے کا نام ہے۔ ذوباریہ نے ایک دیا جلایا۔ جس کے سائے میں بہت سے پروانے اپنے حصے کی شمع حاصل کریں گے اور ساری دنیا کو اُجال دیں گے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 ختم شد