فیصلہ   تحریر حناء شاہد

“ماشاءاللہ۔۔۔۔۔! ماشاءاللہ۔۔۔۔۔۔!!! بہت خوبصورت۔۔۔۔۔۔! قابلِ ستائش۔۔۔۔۔!!!”                                                                                                                   

“یہ الفاظ کس قدر سحر کُن، کس قدر مدہوش کر دینے والے تھے۔ پہلی دفعہ کسی کا مجھے دیکھ کر ایسے الفاظ ادا کرنا مجھے حیرت زدہ کر رہا ہے۔”                                                  

 آنکھوں میں انسو دبائے، ہونٹوں پر تبسم سجائے وہ اپنے پلنگ پر دُبک کر بیٹھی تھی۔ خوشی سے اس کے ہاتھ پاؤں پھولے جا رہے تھے۔                                                                                                                                           گھر میں شادی کی تیاریاں زوروشور سے جاری تھیں۔ ماں باپ کی لاڈلی بیٹی روشانے جہاں ان کے دل کی ٹھنڈک تھی وہیں وہ اپنے ماں باپ کی آنکھوں کا تارا بھی تھی۔ اس کی ہر خوشی کو سر آنکھوں پر رکھا جاتا اور ہر بات کو منہ سے نکلنے سے پہلے ہی پورا کر دیا جاتا۔ سب کے لاڈ پیار نے اسے بےحد حساس اور نازک مزاج بنا دیا تھا۔ یہی وجہ ہے کہ عائشہ بیگم نے روشانے کی شادی کرنے میں عجلت بالکل نہیں دکھائی۔

بلکہ انہوں نے نہایت تحمل مزاجی سے اس کے لیے ایسا سسرال ڈھونڈا۔ جہاں اسے کسی بھی قسم کی کوئی تکلیف نہ ہو۔                                                                                                اچھا خاندان، امیر گھرانہ، دولت کی ریل پیل اور لمبا چوڑا سسرال نہ ہونا، یہ تمام خوبیاں کسی بھی رشتے میں دیکھنا عائشہ بیگم نےاپنا وطیرہ بنا لیا تھا۔ اور اسی سوچ کی وجہ سے انہوں نے نا معلوم کتنے ہی اچھے رشتوں کو منع کر دیا۔ بالآخر طویل جدوجہد کے بعد انہیں ایسا گھرانہ مل ہی گیا۔ لیکن اس طوالت کی وجہ سے روشانے کی عمر کے کئی سال عائشہ بیگم کی سوچ کی نظر ہو گئے۔                                                                            ارمان اور اس کی ماں سے پہلی ملاقات میں ہی عائشہ بیگم اس قدر متاثر ہوئیں کہ کسی سے بھی مشورہ کیے بغیر روشانے کی بات پکی کر دی اور چٹ منگنی پٹ بیاہ والا کام کیا۔                                                                  

                                     —————————————-

“ارمان! عمر میں روشانے سے پانچ سال چھوٹا ہے۔ لیکن یہ ارمان اور اس کی ماں کی اعلی ظرفی ہے کہ انہیں اس بات سے کوئی اعتراض نہیں ہے۔”                                                                                                                                         

عائشہ بیگم نے نہایت تفاخر سے کہا تو ہال میں موجود لوگ چہ مگوئیاں کرنے لگے۔ ایک خاتون جو عائشہ بیگم کے بالکل عقب میں کھڑی تھی چند ثانیے بعد گویا ہوئی۔                                                                   

     “دیکھ لیجیے گا! یہ اچھائی آپ لوگوں کو کہیں مہنگی نہ پڑ جائے ۔ زمانہ دیکھا ہے میں نے، کہے دیتی ہوں ایسے ہی کوئی اپنے کم عمر لڑکے کے ساتھ بڑی عمر کی لڑکی کو نہیں بیاہ لیتا۔ ضرور دال میں کچھ کالا ہو گا۔۔۔۔۔۔۔!”                                                                                                                    

                                                  خاتون نے آنکھیں مٹکا مٹکا کر کہا تو اس کی بات سن کر عائشہ بیگم غصے سے لال ہو گئیں۔ انہوں نے یکدم ہی گھور کر اس خاتون کی طرف دیکھا۔ لیکن دوسرے ہی لمحے اپنے غصے پر قابو پاتے ہوئے بولیں۔                      

                                                                                                                                                           “ایسی باتیں کر کے بدشگونی تو نہ کیجیے۔ ابھی تو نکاح ہوا ہے اور آپ بجائے اس کے کہ دعا کریں کہ روشانے اپنے گھر میں خوش رہے۔ آپ فضول باتیں کر رہی ہیں۔۔۔۔۔۔۔۔!”                                                                                                                                

    “ہائے ! ہائے۔۔۔۔۔۔! ایسا بھی کیا کہہ دیا میں نے۔۔۔۔۔۔؟”                                                                                                                                                                                                          خاتوں نے واویلا مچا دیا۔ پھر کچھ لمحے بعد بولی۔                                                                                            “میں تو ویسے ہی ایک بات کر رہی تھی۔ تم تو  میرے منہ کو ہی آ گئی۔۔۔۔۔۔!”                                                                                                                                                                                                        خاتون نے ہاتھ ہلا کر غصے سے کہا اور پاؤں پٹختے ہوئے وہاں سے چلی گئیں۔                                     

                                                                                          “مجھے سب معلوم ہے یہ لوگ میری بیٹی اور داماد کو دیکھ کر جل گئے ہیں اللہ میری بیٹی کو ایسے لوگوں کی نظرِ بد سے بچائے۔”                                                                                           

                                                                      عائشہ بیگم نے دل ہی دل میں کہا اور سٹیج کی طرف ہو لیں۔ جہاں سب لوگ نئے نویلے جوڑے کے ساتھ تصویریں کھنچوانے میں مشغول تھے۔                                                                                                                             عروسی لباس میں روشانے شہزادی لگ رہی تھی۔ لیکن اس کی آنکھیں اپنے باپ اور بھائی کی منتظر تھیں وہ دونوں کچھ عرصے سے کینیڈا میں مقیم تھے۔ اچانک ویزا نہ ملنے کی وجہ سے وہ پاکستان نہ آ سکے۔ اتنے اہم موقع پر اپنےباپ اور بھائی کی غیرموجودگی جہاں اس کی آنکھوں میں آنسوؤں کی نمی چمک رہی تھی وہیں نئی زندگی کے نئے سفر کے شروع ہونے کی خوشی اس کی آنکھوں  میں نئے دیپ بھی جلا رہی تھی۔

بالآخر۔۔۔۔۔!!! بہت سارے لوگوں کی دعاؤں کے سائے میں عائشہ بیگم  نے بیٹی کو رخصت کر دیا۔ آہستہ آہستہ سب لوگ بھی رخصت ہو گئے۔ عائشہ بیگم کی آنکھیں آبدیدہ ہو گئیں۔ لیکن ان کا دل ہر لمحے بیٹی کو ڈھیڑوں دعائیں دے رہا تھا۔

      ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

“تمہیں اپنی زندگی کا ہمسفر بنا کر جتنی مسرت آج مجھے ہو رہی ہے اتنی شاید پہلے کبھی نہیں ہوئی۔”                                                                                                                        

                                            ارمان نے مسکرا کر کہا۔                                                                                                                                                               

“تمہیں جب پہلی بار دیکھا تھا تو میرا دل زور زور سے دھڑکا تھا اور بس یہی صدا بلند ہوئی تھی یہی ہے وہ لڑکی جس کا مجھے انتظار تھا۔”                                                                                                                                                             

                                                                                                                                                                                                 ارمان کے چہرے پر مسکراہٹ پھیلی ہوئی تھی۔ اس کی بات سن کر روشانے بھی مسکرانے لگی اور شرم کے مارے اس کے گال مزید سرخ ہو گئے۔ روشانے کے ہاتھوں کو اپنے ہاتھ میں تھامے ارمان ساری رات ایسی ہی باتیں کرتا رہا۔ کبھی تو وہ شرمانے لگتی اور کبھی خود پر ناز کرتی۔ یوں ہی باتیں کرتے کرتے وقت کا پتہ بھی نہ چلا اور رات بیت گئی۔                                                                                       

                         —————————————————————

“میں اکتا گیا ہوں اب۔۔۔۔۔۔!”                                                       

                                                                                                                                    ارمان نے غصے سے کہا تو عالیہ بیگم نے چائے کا کپ فوراً میز پر رکھا اور ارمان کی طرف دیکھتے ہوئے جھٹ سے بولیں۔               

                                                                                                  “کس چیز سے اکتا گئے ہو۔۔۔۔۔۔۔۔؟؟؟”                                                                                                                           

                           انداز استفہامیہ تھا۔ مگر ماں کے اس سوال نے اسے مزید تپا دیا۔ وہ فوراً ناشتے کی ٹیبل سے اٹھ کھڑا ہوا۔                                             

  “آپ کی بہو کی بےجا کی تعریفیں کرتے کرتے اور ایک فرمانبردار شوہر کا کردار ادا کرتے کرتے تھک گیا ہوں میں۔”                                                                                                                                                                                                                غصے سے اس کی آنکھوں میں لالی اتر آئی اور وہ چل کر ٹی-وی لاؤنج کی طرف آ گیا۔ ارمان کے رویے سے عالیہ بیگم کو تشویش ہوئی تو وہ فوراً بیٹے کے پیچھے پیچھے چلی آئیں۔                                                                                

 “ایسا بھی کیا ہو گیا ہے۔۔۔۔۔۔؟ تھوڑا صبر سے کام لو۔۔۔۔۔۔۔۔!”                                                               

                                          عالیہ بیگم نے اسے سمجھایا۔                                                                                     

“کیا صبر کروں۔۔۔۔۔۔۔۔؟؟؟ میرے سارے دوست میرا مذاق اڑاتے ہیں۔”                                          

                                                                                                                ارمان نے استفسار کیا تو عالیہ بیگم نے اس کی طرف گھور کر دیکھا اور پھر غصے سے بولیں۔                                                                   “تمہارے یہ دوست تمہیں کھانے کے لیے تو کچھ نہیں دیتے تمہاری ساری عیاشی کا میں نے ہمیشہ خیال رکھا ہے اور تمہیں بس اپنے ان دوستوں کی پروا ہے۔”                                                                                                           

                                                                     عالیہ بیگم کا غصہ آسمان کو چھو رہا تھا۔                                                                                                                                 

                                       “ارمان تمہاری ہر ضرورت کا ہمیشہ میں نے خیال رکھا ہے اور تمہیں بس اپنے دوستوں کی پروا ہے۔”                                                                                                                                                  وہ مسلسل اسے گھور رہی تھیں۔                                                                                                                                      “مام! میرا مطلب تھا ہمیں یہ ڈرامہ اور کتنے دن کرنا ہو گا۔۔۔۔۔۔۔؟ یار میں فیڈاپ ہو گیا ہوں۔”                                                                                                  اس بار وہ تحمل سے بولا مگر اس کے لہجے سے اکتاہٹ واضح ہو رہی تھی۔                                                                                                            “صبر کرو بس! تھوڑے ہی دنوں کی بات ہے۔”                                                                                                                                                                            عالیہ بیگم نے ارمان کا کندھا تھپتھپاتے ہوئے اسے صبر کی تلقین کی۔ لیکن وہ ماں کی کہی ہوئی بات کو بالائے طاق رکھتے ہوئے بےصبری سے پھر گویا ہوا۔                                                                                 “اور کتنا صبر۔۔۔۔۔۔!؟؟؟”                                                                                                                                     اس کا لہجہ سوالیہ تھا۔                                                                                                                      “ماما! اور کتنا صبر۔۔۔۔۔۔؟؟؟ اس عورت کے ساتھ ایک سیکنڈ بھی گزارنا مشکل ہے میرا۔۔۔۔۔”                                                                                                                                                ارمان فورا سے صوفے پر بیٹھ گیا اور اس نے اپنے سر کو دونوں ہاتھوں میں دھر لیا۔ لیکن دوسرے ہی لمحے وہ عالیہ بیگم کی بات سن کر خوشی سے اُچھل پڑا۔                                                                                                                     “گلبرگ میں ایک کینال کی کوٹھی، تمہارے لیے ایک نیو برانڈڈ کار اور پھر تمہیں کینیڈا میں سیٹل کروانا ، بس یہ سارے مطالبات پورے ہو جائیں تو ٹھیک ہے۔ پھر ساری زندگی روشانے اسی کوٹھی کے کسی کونے میں پڑی رہے گی اور تم اپنی پسند کی کسی لڑکی کے ساتھ شادی کر کے اپنی لائف کو انجوائے کرنا اور اگر ہمارے یہ مطالبات پورے نہ ہوئے تو تین لفظ سنا دینا روشانے کو۔۔۔۔۔! پھر وہ اپنے گھر اور ہم اپنے گھر۔”                                                                                                                                               عالیہ بیگم کی بات سن کر ارمان نے ایک بھرپور قہقہہ لگایا۔ جس کی گونج ٹی-وی لاؤنج میں سنائی دی۔                                                                                                                                                                           

           ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

“زندگی کا یہ وقت کس قدر خوبصورت ہے۔ ارمان کس قدر اچھے ہیں۔ ان کی والہانہ محبت نے مجھے کسی چیز کی کمی محسوس نہیں ہونے دی۔ میں بےحد خوش قسمت ہوں۔”                                                                 روشانے اپنی قسمت پر ناز کرتے ہوئے ارمان کی خوبیوں کے تانے بانے بُن رہی تھی۔کہ اچانک دروازے پر ہونے والی دستک نے اسے چونکا دیا۔ روشانے اُٹھی،جلدی سے دروازہ کھولا تو سامنے عالیہ بیگم کھڑی تھیں۔                                                                                                                                              “اسلام علیکم! امی۔۔۔۔۔۔!!!”                                                                                                                                          روشانے نے نہایت ہی مہذبانہ انداز میں عالیہ بیگم کو سلام کیا۔                                                                                                                                                                    “وعلیکم اسلام۔۔۔۔۔۔۔۔!!!”                                                                                                                                                عالیہ بیگم نے اس کے سلام کا جواب دیا۔ کمرے میں داخل ہوئیں۔ اور صوفے پر بیٹھ گئیں۔ روشانے کو بھی اپنے قریب بیٹھنے کا اشارہ کیا اور نہایت ہی بناوٹی انداز میں بات شروع کی۔                                                                                    “روشانے دیکھو۔۔۔۔۔۔! اب تم بھی اس گھر کی ہی ایک فرد ہو۔ اگر ہم تم سے کوئی بات چھپائیں گے تو وہ ٹھیک نہیں ہے۔”                                                                                                                       عالیہ بیگم کا لہجہ بناوٹی تھا۔ مگر وہ تو مہارت رکھتی تھیں بناوٹی انداز میں پُرخلوص الفاظ ادا کر کے سامنے والے کو جھانسہ دینے میں۔۔۔۔۔۔۔                                                                                                                                 “امی جان! کیا ہوا ہے۔۔۔۔۔۔؟ کھل کر بات کریں۔۔۔۔۔۔!”                                                                                                    روشانے نے جھٹ سے پوچھا۔ اس کے انداز میں فکر نمایاں ہو رہی تھی۔                                                                                                                                     “روشانے ! جو بات میں تمہیں بتانے جا رہی ہوں اس کو سننے کے بعد یقیناً تمہیں دکھ ہو گا۔ مگر میرا خدا جانتا ہے اس میں ہماری نیت خراب نہیں تھی اور تم سے بھی درخواست ہے ہماری محبت پر شک نہ کرنا۔”                                                                                                                                                                                                                            عالیہ بیگم نے لجاجت سے کہا تو روشانے نے اپنا ہاتھ عالیہ بیگم کے ہاتھ پر دھرا اور دھیرے سے بولی۔                                                                                                                       “امی! آپ کیسی باتیں کر رہی ہیں۔۔۔۔۔۔؟ میں آپ سے اور ارمان سے کبھی بدگمان نہیں ہو سکتی۔ آپ بےفکر ہو کر بولیے۔”                                                                                                                                                وہ حلاوت آمیز لہجے میں معصومیت سے بولی۔                                                                                                                                “روشانے! یہ گھر ہمارا نہیں ہے۔ بلکہ کرائے کا ہے اور مالک مکان ہمیں بہت تنگ کر رہا ہے۔”                                                                                                                        عالیہ بیگم نے نہایت معصومانہ انداز سے کہا تو ان کی بات سن کر روشانے حیرت سے بولی۔                                                                                                                                                “لیکن امی۔۔۔۔۔۔۔! آپ نے تو کہا تھا یہ گھر آپ کا ہے اور اب آپ۔۔۔۔۔۔!!!”                                                                                                                                          ابھی روشانے کی بات مکمل بھی نہ ہو پائی تھی کہ عالیہ بیگم نے ساری کی ساری بات روشانے کی ماں پر ڈال دی۔                                                                                                                                                              “اب دیکھو روشانے! میں اور ارمان جب تمہیں دیکھنے تمہارے گھر آئے تھے تو تم ہمیں بےحد پسند آئی۔ لیکن تمہاری ماں کی ڈیمانڈز نے ہمیں یہ قدم اٹھانے پر مجبور کیا۔ نہیں تو وہ پھر کبھی بھی تمہاری شادی ارمان کے ساتھ نہ کرواتیں۔”                                                                                                                                                                                       عالیہ بیگم کی یہ دلیل کام کر گئی اور روشانے کے منہ پر خاموشی کا قفل لگا گئی۔                                                                                               “تم اپنی ماں سے بات کرو کہ وہ اسی علاقے میں کوئی گھر ہمیں کرائے پر لے دیں اور اگر تمہیں یہ سب نامناسب لگتا ہے تو پھر ٹھیک ہے ہم اپنے پرانے والے گھر میں چلتے ہیں۔”                                                                                                                           عالیہ بیگم کی یہ ساری باتیں روشانے کی حیرانگی میں مزید اضافہ کر رہی تھیں۔ لیکن اس وقت اسے کچھ سمجھ نہیں آ رہا تھا۔                                                                                                                          “اب تم خود سوچو بیٹی۔۔۔۔۔! اس گھر میں تم عیش سے رہتی ہو۔ وہاں اس گھٹیا سے چھوٹے سے علاقے کے چھوٹے سے گھر میں تم زندگی کیسے گزارو گی۔۔۔۔۔۔؟ میرا کیا ہے میں آج زندہ ہوں کل نہیں ! تمہارے ہی فائدے کی بات ہے سوچنا ضرور۔۔۔۔۔۔!!!”                                                                                                                                                                              عالیہ بیگم نے نہایت ہی محتاط انداز میں اپنی چال چل دی۔ عالیہ بیگم تو بات روشانے کے گوش گزار کر کے وہاں سے چلی گئیں۔ لیکن روشانے کو سوچوں کے گہرے سمندر میں دھکا دے گئیں۔ بالآخر۔۔۔۔۔۔! روشانے نے عائشہ بیگم کو فون کر کے ساری بات بتا دی۔ پہلے تو عائشہ بیگم کو بہت غصہ آیا ۔ لیکن جب تحمل سے سوچا تو روشانے کا گھر بسانے کے لیے عالیہ بیگم اور ارمان کی اس خواہش کو پورا کر دیا اور ڈیفنس میں گھر خرید کر روشانے کے نام کر دیا اور اپنی بیٹی کے لیے ایک خوشحال زندگی کا گمان کر کے مطمئن ہو گئیں۔

      ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

“ارمان! آج ذرا دفتر سے جلدی گھر آ جائیے گا۔ مجھے امی کی طرف جانا ہے۔”                                                                                                                               روشانے نے محبت سے کہا تو اس کی بات سن کر ارمان غصے سے لال ہو گیا اور ٹائی کی ناٹ حصے سے باندھتے ہوئے بولا۔                                                                                                                                      “تمہاری ماں نے کون سا کار خرید کر دی ہے۔ جو میں آئے روز تمہیں تمہاری ماں کے گھر لے کر جاؤں۔ میں بسوں میں دھکے کھا کر دفتر جاتا ہوں۔ تمہارے یہ چونچلے نہیں اُٹھا سکتا۔۔۔۔۔۔۔!”                                                                       ارمان نے غصے سے فائل اُٹھائی اور بڑبڑاتا ہوا وہاں سے چلا گیا۔ لیکن روشانے کو ارمان کے اس رویے نے جہاں شدید صدمے میں دوچار کیا وہیں عالیہ بیگم کی بات سن کر وہ چونک کر رہ گئی۔                                                             “ارمان نوکری کر کر کے تھک گیا ہے۔ وہ اپنا کاروبار کرنا چاہتا ہے۔ تمہارے ماں باپ کے پاس اتنا پیسہ ہے اگر وہ تیس چالیس لاکھ ارمان کو کاروبار کے لیے دے دیں تو کون سا ان کا خزانہ ختم ہو جائے گا۔۔۔۔۔۔؟”                                                                                                                                                                                                 عالیہ بیگم نے استفہامیہ انداز میں طنز کیا اور پھر قدرے توقف سے بولیں۔ جبکہ روشانے وہ چپ سادھے حیران کھڑی تھی۔                                                                                                                                                               “اپنی ماں کے گھر جانا ہے تو ابھی جاؤ۔۔۔۔۔۔! شوق سے جاؤ۔۔۔۔۔! مگر واپس اسی وقت آنا جب ارمان کے کاروبار کے لیے پیسے اور برانڈ نیو کار کی چابی تمہارے ہاتھ میں ہو اور اگر تمہارے ماں باپ یہ مطالبات پورے نہیں کر سکتے تو ہمیں بھی تمہاری ضرورت نہیں ہے۔”                                                                                              عالیہ بیگم کے تیکھے لہجے نے روشانے کے سارے وجود کو چھلنی کر دیا۔ اس کے گلے میں آنسوؤں کا گولہ پھانس کی طرح اٹک گیا۔                                                                                                                      “معلوم نہیں ! یہ لالچ ہے۔۔۔۔۔۔؟ ہوس ہے۔۔۔۔۔؟ یا پھر ضرورت۔۔۔۔۔۔؟”                                                                                                                                  روشانے دل ہی دل میں خود سے مخاطب ہوئی۔ لیکن اس کے دل میں تو خاموشی کے قفل پڑے تھے۔ ایسا سکوت چھایا تھا کہ کسی بھی سوال کا کوئی جواب نہیں مل رہا تھا۔ وہ گھر آئی اور عائشہ بیگم کے سامنے آنسوؤں سے بھیگے اس نازنیں چہرے نے مطالبات کی نئی لسٹ تھما دی۔                                                                                           “امی! میں ارمان سے بےحد محبت کرتی ہوں۔ لیکن میں محبت کے نام پر کسی کی ضروریات پوری کرنے کے لیے خود کو سیڑھی نہیں بنانا چاہتی۔”                                                                                                                                                   روشانے نے ہمت سے کام لیتے ہوئے اپنی ماں کی طرف سوالیہ نظروں سے دیکھا اور اپنے انسان ہونے کا ثبوت دیا۔                                                                                                                                   “ایسے نہیں کہتے۔۔۔۔۔۔! اللہ کا دیا ہوا سب کچھ ہے ہمارے پاس۔۔۔۔۔۔مجھ سے اور تمہارے ابا سے جہاں تک ہو گا دنیا کی ہر خوشی لا کر تمہارے قدموں میں رکھ دیں گے۔تم پریشان کیوں ہوتی ہو۔۔۔۔۔؟ سب ٹھیک ہو جائے گا۔”                                                                                                                                                                        عائشہ بیگم نے روشانے کو گلے سے لگاتے ہوئے اسے حوصلہ دیا۔عالیہ بیگم اور ارمان کے ان مطالبات کو بھی پورا کر دیا گیا۔ روشانے پھر سے اپنی ساس اور شوہر کے ساتھ خوش و خرم زندگی گزارنے لگی۔ یہ وقتی خوشی تھی یا پھر زندگی بھر کا دھوکا۔۔۔۔۔۔!                                                                                                                                         روشانے حقیقت جان کر بھی انجان بن رہی تھی یا پھر مشرقی لڑکیوں کی تربیت میں شامل ہوتا ہے گھر بسانے کے لیے اپنی عزت ِ نفس کو روند ڈالنا۔

                       ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

                            ؎ بہت جدا  ہے اوروں  سے  میرے درد    کی کیفیت

                           زخم کا کوئی نشان نہیں اور تکلیف کی کوئی انتہاء نہیں

پھر زندگی نے ایک اور کروٹ بدلی۔ روشانے کی شادی کو چار سال بیت گئے۔ وقت گزرنے کے ساتھ ساتھ ارمان کا رویہ بھی بدل گیا۔ رات کو دیر سے گھر آنا اس کا معمول بن گیا اور اگر کبھی روشانے دیر سے گھر آنے کی وجہ پوچھ لیتی تو پھر ایک نیا فساد برپا ہو جاتا۔ دولت کی ریل پیل نے جہاں ارمان کا دماغ ساتویں آسمان پر پہنچا دیا وہیں بری صحبت نے اسے نشے جیسی بری لت میں مبتلا کر دیا۔ نشے کی حالت میں وہ اکثر روشانے کے ہاتھوں اور بازوؤں پر جلتا ہوا سگریٹ لگا دیتا۔                                                                         قسمت نے جہاں اتنے ستم ڈھائے۔ وہاں ایک ستم یہ بھی کر دیا کہ شادی کے چار سال بعد بھی روشانے کو اولاد جیسی نعمت سے محروم رکھا۔ عالیہ بیگم اٹھتے بیٹھتے طنز کے وہ نشتر چلاتیں۔ جس سے روشانے کا سارا وجود چھلنی ہو جاتا اور آج تو عالیہ بیگم نے حد ہی کر دی۔ روشانے کچن میں کھانا بنانے میں مصروف تھی۔ جب عالیہ بیگم نے اونچی آواز میں رونا شروع کر دیا۔                                                                           “ہائے! ہائے۔۔۔۔۔! ہمارے تو نصیب ہی کھوٹے ہیں۔ جو روشانے جیسی منحوس ماری سے پالا پڑ گیا۔ ہائے! میرا تو اکلوتا بیٹا ہے اور وہ بھی کیا ساری زندگی اولاد کی نعمت سے محروم رہے گا۔”                                                          انہوں نے اپنے آنسو پونچھتے ہوئے روشانے کی طرف نفرت سے دیکھا۔                                                                                                           “امی! یہ تو اللہ کے کام ہیں۔۔۔۔۔!!!”                                                                                                                                                                                     روشانے حسرت سے بولی تو عالیہ بیگم غصے سے اس کی طرف دیکھنے لگیں اور پھر نخوت سے گویا ہوئیں۔                                                                                                                                                    “اپنے قصور کو خدا پر نہ ڈالو۔ جب عورت کی عمر زیادہ ہو جائے تو وہ بچہ پیدا کرنے کی صلاحیت کھو بیٹھتی ہے۔”                                                                                                                                                                                          عالیہ بیگم کے لہجے میں حقارت تھی۔ روشانے نے سر اُٹھا کر ایک لمحے کے لیے عالیہ بیگم کی طرف دیکھا۔                                                                                                                                                                                 “امی! اگر یہ سب میرے اختیار میں ہوتا تو میں ضرور اپنے ماں باپ سے فرمائش کرتی تو وہ میری خوشی کے لیے آپ کی یہ خواہش پوری کر دیتے۔”                                                                                                                                                روشانے کے صبر کا پیمانہ ٹوٹ گیا تھا۔                                                                                                                                                                                                            “اللہ نے اور راستے بھی تو بتائے ہیں۔”                                                                                                                                                    عالیہ بیگم کہاں باتوں میں دبنے والی تھیں۔ اپنے مطلب کی بات کو پورا کرنا اور اپنا کام نکلوانا وہ خوب جانتی تھیں۔                                                                                                                                                                               ” کیا مطلب ہے امی آپ کا۔۔۔۔۔۔۔۔؟؟؟”                                                                                                                                   روشانے نے چونک کر حیرت سے پوچھا۔                                                                                                                                             “مطلب صاف ہے۔ جو چیز تم نہیں دے سکتیں وہ کسی اور سے حاصل کر لیتے ہیں۔”                                                                                                                                                            مادہ پرست اور خود غرض لوگوں سے کچھ بعید نہیں ہوتا۔ عالیہ بیگم کی خودغرضی انتہاء کو چھو رہی تھی۔                                                                                                                                                                                                                                                    “کیا یہ بھی ممکن ہے۔۔۔۔۔۔؟ میری وفا،میری قربانی، میری دولت بھی کیا ان لوگوں کو کبھی میرا نہیں بنا سکے گی۔۔۔۔۔۔؟”                                                                                                                                          وہ شاکڈ تھی۔                                                                                                                                           “میں ان کے لیے محض ایک ذریعہٰ ہوں۔۔۔۔۔خواہشات اور مطالبات کو پورا کرنے کا۔ اگر میں ان کے مطالبات کو پورا نہ کروں تو میں بےکار ہو گئی۔”                                                                                                                          روشانے خاموش بیٹھی تھی۔ سوالوں کی بوچھاڑ تھی مگر جواب کہیں نہیں تھا۔                                                                                                                                                                           “روشانے! تم ارمان کو دوسری شادی کی تحریری اجازت دے دو۔”                                                                                                                                     عالیہ بیگم نے حتمی طور پر اپنا فیصلہ سنایا۔ جو روشانے پر بم کی طرح گرا۔ اسے یوں محسوس ہوا جیسے کسی نے اس کے پاؤں تلے سے زمین کھینچ لی ہو پھر روشانے نے اپنی خاموشی کے اس قفل کو توڑا اور لڑکھڑاتی زبان کے ساتھ عالیہ بیگم سے ایک سوال پوچھا۔                                                                                                                                                        “ک۔۔۔۔۔ک۔۔۔۔۔کیا ارمان کا بھی یہی فیصلہ ہے۔۔۔۔۔۔؟”                                                                                                                                                                                  نجانے کس قدر ہمت کر کے اس نے یہ سوال پوچھا تھا۔                                                                                                                         “تو کیا اس کا فیصلہ مجھ سے الگ ہو گا۔۔۔۔۔؟ وہ تو تم سے شادی ہی نہیں کرنا چاہتا تھا۔ بھلا تم خود سوچو کون کم عمر لڑکا اپنے سے پانچ سال بڑی عمر کی عورت سے شادی کا خواہشمند ہو گا۔۔۔۔۔۔؟ ہمیں تو بس دولت چاہیے تھی۔ اسی لیے تمہیں بیاہ لائے۔اب تم ہمیں اولاد نہیں دے سکتی تو ساری زندگی کیوں تمہارے ساتھ بندھا رہے میرا بیٹا۔۔۔۔۔۔! اسے بھی جینے کا حق ہے۔۔۔۔۔! یہ تو میں تھی جس نے اپنے بیٹے کو تم جیسی بانجھ لڑکی کے پلو سے باندھے رکھا۔”                                                                            عالیہ بیگم نے خفگی سے کہا اور ایسی خودغرضانہ باتیں کیں۔ جنہوں نے روشانے کے سارے وجود کو چھلنی کر دیا۔                                                                                                                                                  “ٹھیک ہے! مجھے آپ کی اس خواہش پر بھی کوئی اعتراض نہیں ہے۔ لیکن میری ایک شرط ہے۔”                                                        اس نے اپنے اندر ٹوٹتی پھوٹتی روشانے کو ایکدم ہی گلا گھونٹ کے مار دیا اور انتہائی جراۤت سے بولی۔ جس سے عالیہ بیگم بوکھلاہٹ کا شکار ہو گئیں۔                                                                                                                                         “ش۔۔۔۔۔ش۔۔۔۔۔ش۔۔۔۔۔۔شرط۔۔۔۔۔۔! کیا شرط ہے تمہاری۔۔۔۔۔۔۔؟؟؟”                                                                                                                                    عالیہ بیگم نے بوکھلا کر پوچھا۔                                                                                                                                                       “ارمان سے کہہ دیجیے گا مجھے طلاق بھجوا دے۔ آپ بھی ایک ہفتے کے اندر میرا یہ گھر خالی کر دیجیے گا۔ میں اپنی امی کے گھر جارہی ہوں اور گاڑی کی چابی کمرے سے خود ہی لے لیتی ہوں۔ اب میں اس سے زیادہ سانپوں کو دودھ نہیں پلا سکتی۔”                                                                                                                           روشانے غصے سے چِلا رہی تھی۔ آج پہلی بار اس نے عالیہ بیگم کی آنکھوں میں آنکھیں ڈال کر بغیر کسی ڈر اور خوف کے اپنی بات کو بیان کیا۔ روشانے کی باتوں نے عالیہ بیگم کو حیرت زدہ کر دیا اور ان کے اوسان خطا ہو گئے۔ لیکن جب تک وہ اس کیفیت سے باہر نکلتیں روشانے سارا ضروری سامان لے کر وہاں سے جا چکی تھی۔

                           ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

                             ؎ میری رسوائی میں غیروں کا کوئی دوش نہیں

                                اس  میں شامل  ہیں میرے  اپنے چاہنے  والے

عائشہ بیگم نے روشانے کو اپنی چوکھٹ پر بمع سوٹ کیس دیکھا تو وہ حواس باختہ ہو گئیں۔ لیکن روشانے جو آج ساری کشتیاں جلا کر آئی تھی۔ اس کے چہرے پر ندامت یا دکھ کے آثار بالکل نہیں تھے۔                                                                                                                                                                                         “امی! غمزدہ ہونے کی ضرورت نہیں ہے۔ میں نے اس جہنم سے آزاد ہونے کا فیصلہ کر لیا ہے۔”                                                                                                                                                                                       روشانے نے نہایت جراۤت سے کہا۔                                                                                                                                                                                                                                                                                                    “مگر! اب عالیہ بیگم اور ارمان کیا چاہتے ہیں۔۔۔۔۔۔۔۔۔؟؟؟”                                                                                                                                روشانے کو اپنے پاس صوفے پر بٹھاتے ہوئے عائشہ بیگم نے اپنے حواس سنبھالتے ہوئے پوچھا۔                                                                                                                                                                     “وہ چاہتے ہیں میں میکے سے انہیں اولاد بھی لا دوں۔”                                                                                                          وہ استہزائیہ مسکرائی۔ عائشہ بیگم کو ایک لمحے کے لیے گمان ہوا کہ شاید روشانے کے دماغ پر ان ساری باتوں کا اثر ہو گیا ہے۔                                                                                                                                                                                                “روشانے! ہوش کرو۔۔۔۔۔۔۔! یہ تم کیا کہہ رہی ہو۔۔۔۔۔۔۔؟ مجھے تو کچھ سمجھ نہیں آ رہا۔”                                                                                                                    عائشہ بیگم نے روشانے کے کندھے کو تھپتھپایا اور اسے حوصلہ دیتے ہوئے پوچھا۔ وہ اس ساری صورتحال سے بوکھلاہٹ کا شکار ہو گئی تھی۔                                                                                              “امی! ہوش میں تو میں اب آئی ہوں۔”                                                                                                                           وہ غصے سے چِلائی۔                                                                                                                                                  “کیا مطلب روشانے۔۔۔۔۔۔۔؟ کیا ہوا ہے۔۔۔۔۔۔۔۔۔؟ میرا دل بہت گھبرا رہا ہے بیٹی۔۔۔۔۔۔۔۔!”                                                                                                                                                              عائشہ بیگم کے ہاتھ پاؤں یخ ہو گئے۔ انہیں کچھ بھی سمجھ نہیں آ رہا تھا۔                                                                                                      “سب قصور آپ کا ہے امی۔۔۔۔۔۔۔! جب کسی کے کردار کی بجائے اس کا گھر، اس کی جائیداد اور دولت کے معیار کو پرکھا جائے تو بیٹیوں کے گھر کبھی نہیں بستے بلکہ ان کے گھر پہلے دن ہی اجڑ جاتے ہیں۔ شادی شدہ ہوتے ہوئے بھی وہ طلاق یافتہ جیسی زندگی گزارتی ہیں۔”                                                                                 وہ غصے سے چِلا رہی تھی۔گویا اپنے دل کی بھڑاس نکال رہی ہو۔ جبکہ عائشہ بیگم گم صم بیٹھیں بیٹی کی ساری باتیں سن رہی تھیں۔                                                                                                               “یہ دیکھیں میرے بازو، یہ سگریٹ سے جلے کے نشان، یہ نشان میرے بازوؤں پر نہیں لگے بلکہ انہوں نے تو میری روح کو گھائل کر دیا ہے امی۔۔۔۔۔۔!”                                                                                                                                           وہ پھوٹ پھوٹ کر رونے لگی۔ جنکہ عائشہ بیگم اس کی خوبصورت کلائیوں کو بدنما کرتے ہوئے ان دھبوں کو غور سے دیکھ رہی تھیں۔                                                                                                                         “امی! میں تو صرف ان کی حرص اور ہوس کو پورا کرنے کا ایک ذریعہٰ تھی۔ایک سیڑھی کے سوا میری کوئی حیثیت نہیں ہے اور اب وہ ارمان کی دوسری شادی کرنا چاہتی ہیں۔ محض اولاد کے لیے۔۔۔۔۔۔!”                                                                                                                                                                               اب کہ روشانے بلک بلک کر رونے لگی۔ عائشہ بیگم نے اسے گلے سے لگا لیا۔اور حوصلہ دیتے ہوئے بولیں۔                                                                                                                                                                    “لعنت بھیجو۔۔۔۔۔۔! ایسے حریص لوگوں پر۔۔۔۔۔”                                                                                                                            ان کا انداز حقارت آمیز تھا۔                                                                                                                 “ساری غلطی میری تھی۔ میں نے تمہارے لیے امیر خاندان ڈھونڈا۔ ان کی دولت اور رہن سہن کو پرکھتی رہی۔ مگرکردار کو میں نے نظرانداز کر دیا۔ میں نے یہ کبھی سوچا ہی نہیں کہ یہ سب کچھ دکھلاوا بھی ہو سکتا ہے۔ سارا قصور میرا ہی ہے۔”                                                                                                                                                                    عائشہ بیگم نے اپنا قصور تسلیم کرتے ہوئے نہایت تاسف سے کہا۔ مگر اب کیا ہو سکتا تھا۔ ایک غلط سوچ روشانے کی زندگی کو برباد کر گئی تھی۔                                                                                                                                      

                        ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ارمان جب واپس آیا تو عالیہ بیگم نے اسے ساری صورتحال سے آگاہ کیا۔ تو وہ غصے میں اپنے ہوش و حواس کھو بیٹھا اور فورا ہی روشانے کے ابو کو کینیڈا فون کر کے روشانے کے کردار پر حرف گیری کی۔ پہلے تو وہ بےحد پریشان ہوئے۔ لیکن انہیں اپنی بیٹی روشانے پر مکمل بھروسہ اور اعتماد تھا۔ لہذا انہوں نے روشانے سے تفصیلاً بات کی۔ روشانے نے بھی رورو کر اپنے باپ اور بھائی کو گزشتہ چار سالہ زندگی کے نشیب و فراز کے بارے میں آگاہ کیا۔ ساری حقیقت جان لینے کے بعد انہوں نے روشانے کو بھرپور حوصلہ دیا اور روشانے کی عقلمندی اور جراۤت مندانہ فیصلے پر اسے بھرپور سراہا۔ اولین فرصت میں اسد اور اس کے ابو پاکستان آ گئے۔ دوسری طرف ارمان اپنےہوش و حواس کھو بیٹھا۔ اس نے اپنے دوستوں سے بات کی جو غنڈہ عناصر سے تعلق رکھتے تھے۔ رات کے وقت انہوں نے روشانے کے گھر کے باہر فائرنگ کی۔ جس کے نتیجے میں اسد شدید زخمی ہوا۔ اسے فوری طور پر ہسپتال منتقل کیا گیا۔ روشانے کے والد کے تعلقات کمشنر صاحب سے تھے۔ انہوں نے ساری بات سننے کے بعد روشانے اور اس کے ابو کو حوصلہ دیا اورتھانے میں ایف-آئی-آر بھی درج کروا دی۔                                                                                                                                                                             تھانیدار نے شام کے وقت دھاوا بول کر ارمان اور اس کی لالچی ماں کو حوالات میں بند کروا دیا۔ قبل اس کے کہ ارمان اور عالیہ بیگم ضمانت کروا کر جیل سے رہا ہوتے روشانے کے ابو نے کوٹھی اور گاڑی کو فروخت کر دیا اور خلع کے لیے عدالت سے رجوع کیا۔ بالآخر تین ماہ میں خلع ہو گئی۔ ایک غلط سوچ نے روشانے کی زندگی کو جہنم میں دکھیل دیا۔ اگر پہلے مطالبے پر ہی “نہیں” کا قفل لگا دیا جائے تو زندگیاں برباد ہونے سے بچ سکتی ہیں۔ روشانے کے ابو کو اس بات کی خوشی تھی کہ ان کی بیٹی نے بروقت اپنی زندگی کو بےحد عقلمندی اور جراۤت و دلیری سے بچا لیا تھا۔                                                                                                                                                                         وہ ایک قدم جو اس کے لیے اُٹھانا بہت مشکل تھا۔ وہ قدم اس نے اُٹھایا اور اپنی زندگی کو برباد ہونے سے بچا لیا۔                                                                                                                                                                                                                               “جہیز۔۔۔۔۔۔۔۔۔!!!”                                                                                                                                               ایک لعنت ہے۔۔۔۔۔۔۔۔۔۔۔!!!                                                                                                                                                                        ایک ایسا معاشرتی ناسور ہے جو ہماری بیٹیوں کی عمروں کو دیمک کی طرح چاٹ رہا ہے۔ اگر ہم سب مل کر فیصلہ کریں اور اپنا اپنا قدم اٹھائیں تو اس معاشرتی ناسور کو جڑ سے اکھاڑ پھینکنے میں اہم کردار ادا کر سکتے ہیں۔

                                  ؎ ساری چیزیں ہی بدل کر رہ جائیں

                                    ایک   ہنر   ایسا  بھی ایجاد  کروں

۔۔۔۔۔۔۔۔۔۔۔۔۔۔۔۔۔۔

ختم شد